空間詞 place ê「tè/tèr」，《教典》漢字寫做「地」！閣註明「tè」是「地」ê 白讀音，野大 ê 【破拍 phuà-phah】！
「地」--字，漳腔無分文白計是讀「tē」，泉腔白讀「terē (老泉)、tuē (新泉)」，文讀「tē」，在來 ê 漢文傳只一棧，另外包括文讀詞彙，ex.性地、熟地、生地......。《教典》所收 ê 文讀「tuē」應當刪除，文讀【地 tē】詞目所 kah ê 方音差表應當徙去白讀「地」 ê 詞目。
「地」ê 白讀如前所述，有「tē (漳)、terē/tuē (泉)」，無《教典》ê「tè」，《教典》ê「地(tè)」用佇「鎮地、掃地、講落到地、無地看、滿地去」，只字漳廈腔讀「tè」、泉同腔讀「tèr」。「地」無讀做中央元音ê「tèr」，就算是中古音「【廣韻】徒四切【集韻】大計切【韻會】徒二切【正韻】徒利切」，也計是全濁去聲，無讀做陰去。總--是，「鎮 tè/tèr、掃 tè/tèr、講落# 到 tè/tèr、無 tè/tèr 看、滿 tè/tèr 去」ê「tè/tèr」，無可能是「地 ê 白讀 tè」，因為「地」無讀做「tè」ê 白讀，嘛無可能讀做中央元音(schwa)。
「鎮 tè/tèr、掃 tè/tèr、講落到 tè/tèr、無 tè/tèr 看、滿 tè/tèr 去」ê「tè/tèr」，有的先進主張本字是「帶」（ex.《閩南方言大詞典》），「帶」是蟹攝開口一等，蟹開一咍韻 ê 白讀有「-e (漳廈音) / -er (泉同音)」ê 韻母，ex.胎、戴、代、貸、賽，毋拄「帶」佇蟹開一泰韻韻，所致洪惟仁教授 iu 原主張語源不明。南管在來寫做訓用字「處」；若就實用書寫 ê 角度，會用得考慮民間另外一字訓用字【塊 tè/tèr】。
另外一个音讀「tī」，《廈英》kap《甘字典》計主張「tī」是「地」ê 非文讀（林建輝先生嘛主張是白讀），《教典》主張「tī」是「地」ê 文讀，拍算是因為中古韻書《集韻》有記「徒二切」。「地」--字讀做「tī」，干焦用佇「土地公、土地婆」ê「土地」，是專用，因為漳州話「土地公」會講做「thóo-tē-kong」，所致【地 tī】權算是泉同廈腔，嘛有可能是來自官話棧。