「詳細」是一个文讀詞彙，泉腔个「細」--字文讀亦是西韻个「sè」，只个詞孤有泉音「siông-sè」、漳音「siâng-sè」，無「siông-suè」个音讀，《廈英》、《臺日》也是安爾記載，「細」--字佇「詳細」只个文讀詞彙並無白讀「siông/siâng-sè/suè/serè」个漳泉韻母對應，所致次字無分漳泉孤有一个文讀音「sè」。
《教典》「詳細」个第二音讀「siông-suè」，拍算是編輯者kāi-kī格(kik)--个，是「錯誤類推」，毋是實際个語言調查；顛倒漳腔實際有个「siâng-sè」，受體例限制煞無收。建議刪除「siông-suè」个音讀。
經過筆者个建議，《教典》已經佇2014年12月刪除「siông-suè」个音讀。