有收【手爪賤 tshiú-jiáu-tsiān】ê 辭典孤《臺日》kap《新編華台語對照典》。《臺日》共尾字的「tsiān」寫做訓用字 ê「弄」，tse 是日文訓讀 ê 傳統，伊解說意思是「手癖が悪い。盗をする。」中文就是『手不老實，好偷東西。竊盜。』而且後壁【歹手爪】ê意思講是「同上」，就是 kap『手不老實，好偷東西。竊盜。』sâng 款。《新編華台語對照典》收 ê【手爪賤 tshiú-jiáu-tsiān】，意思講是『手腳不乾淨』。
論真，【手爪賤 tshiú-jiáu-tsiān】在我 ê 語感並毋是【歹手爪】ê 意思，是指『喜歡隨便亂動東西』，因為阮後生就是有去予阮老母按呢唸--過，結果煞無辭典按呢記，孤頂懸兩卷辭典記做 kap【歹手爪】同義（《新編華台語對照典》有可能是直透抄《臺日》--ê），煞予我淡薄仔懷疑我 kāi-kī，感謝四位先進來贊聲，尤其是秀黛姊--仔，lír ê kué-serh kap guá ê lí-kái sann-sâng。